VAYA CON DIOS

“Sweet to the sweet; Farewell” – W. Shakespeare.

Khawvela kan khualzin kawng, khawhar taka kan zawh rek rek laiin, lampui changkhatah khualzinpui duhawm tak kan han chhar a. Kan ritphurh inchhawktawnin, khawharna ah kan in hnem a. Kawng chho ulh tak pawh kawng zal zawh a, hlim taka kan zawh ho laiin ‘Mangtha’ tia inthen a ngai fo thin. Inthenna khawvela cheng hringfate tan hei hi ‘Lei dan’ a ni a, kan duh emaw duh lo emaw kan inthen a ngai tho tho thin. Thenna awm tawh lohna hmun chu lukawlh-lu leh vanram chauh a ni si a.

Hringfate inthen leh tura intawng a, intawng leh tur a kan inthenna khawvel ah hian, inthenna kan tih hi tuar thiam a har hle. Hemi huang a inthenna kan tih hi ‘ka rin ang i lo va’n ni lo; anih leh ka chhuak ang, Zawngchhebawl’ tia nupa tukhum chhah in chhawn ngat ngat te inthenna hi ka huam tel lova. La inthlahlel ngawih ngawih, thihna emaw, pumpelh theih loh harsatna dang emaw avanga inthenna hi a ni sawi ka tum chu. Nia, la inthlahlel ngawih ngawih chunga inthen lungchhiatthlak zia hi, kei ve mai hian ‘A,AW,B’ remkhawm hmang a sawifiah ngaihna ka hre hauh lo. Pa tawnghmang thiam PS Chawngthu meuh pawhin, “Ami leng tawnah hian tuar dan hril thiam awm maw?” tih bakin sawi ngaihna a hre bik lo.

Pathianin khawvel a chhungkaw lungphum a phum atanga vawiin thlengin thu rapthlak tak pakhat ‘Inthenna’ tih hian khawvel pum a thangkhawk a, mihring, hmangaihna chhete tal pianpui tawh phawt chu tih khawhar loh hleih a nei lo. Intawn a, inngainat a, inthen leh thin hi hmasang ata tawh hringnun thawnthu kumhlun a ni. Thlasik pawhin leilung nena in rem tak a an in kawp rial rial laiin, thal tan, a hun a ken a ngai a. Thinghnah te pawhin an lo chawrchhuahna leh an vanglai an hman na thingzarte chu lungzur taka an chhuahsan a ngai a. Vanlaizawla Chawngmawii leh Hrangchhuana indi pawh lungchhe vankai a an inthen a tul leh thin. Inthenna! Inthenna! Inthenna hi a bang thei si lo. Inthen dawn darkara ‘VIP’ ten kan beng bula zawi thawp sat a ‘Mangtha’ min tih ri leh, an sawi lem loh thu tam tak, an mitmenga an lantir ten thawm dang zawng zawng a khuh bo vek chinah chuan patling khawhawi hi a tawi tak mai a nia.

Hlim taka kan khawsak ho dial dial laiin, kan inpeih nge inpeih lo pawh min zawt hmasa lovin hunin inthenna hi a her chhuah pui leh mai thin. Lianchhiari’n a pasal Pawngsena thlima, a bialpa hlui Chawngfianga, Sinai tlanga Pathian thupek pasarihna a bawhchhiat pui tuma inhnit hlap hlap chung a;

“Kan inthen nan emaw Chhiarthang ar za a khuan”

tia a sak hawm hawm kha aw chhang chung chung pawha kan zawm ve a tul thin. Hlimsarha ‘Hi’ kan in tih hnu lawkah, meng hnuai raih chunga ‘Bye’ kan intih leh a tul fo thin. Inthenna khawvel a ni miau si a.

Inthenna tuar thiam lo fe fe hi khawvelah hian an lo chhuak tawh a, an lo chhuak mek a, an lo chhuak zel dawn a ni. Thingsei khaw tlangval hmeltha, inthenna atuar thiam loh u chuak avanga Zofate zinga la thang ta reng Thangzawra phei kha chuan a bialnu Lalhniangi a then na a ti lutuk a, artui chhum hmin, kheh sa diam lehnghal pawh a seh keh zo lova, A Tuanpui Siali te khua, Neihbawih chu, a hnam timualphotu nih pawh pawisa lo leh, mite sawi dan tur pawh pawisa lova, dawn hauh lovin, mittui hnam sawk sawk chungin a thlir a; a thlir reng lai chuan lunglengin a thi tawp mai a ni. Awmholerhi Pachuau pawhin a tlangvalpa Hauthuama athen chu tuar thiam lovin, chaw pawh chaw a ngai tawh lovin riltamin a awm a, rei ngial dangro dangchara a vahvaih hnuah ‘thih rin zu’ tlak pawp pahin:

“Chuti lunglen ka tuar a hneh chuan Fam za nang a, lung ka chhir lo ve, Hrilh hmang rengah lo fam ing e”

tiin inthenna khawvel achhuahsan a, Hmangaihna avangin a martar ta a ni. Aw, an va khawngaihthlak tehlul em! Hmangaihna Lalpan an hmangaihna rinawm tak avangin malsawm hlawm mawlh rawh se.

A bialpa Chalthanga nen a an inthen avanga hla phuah thiam Laltheri, mi á khawsaka a khawsa ang mai khan, Peasant poet kulmuk John Clare pawhin a bialnu a then chu a tuar thiam lova; nundan phung pangngai piah lamah nungin a in dawm kun tlawk tlawk a, rualpawla han in tihhlim ve a tum pawhin a hlawhchham chiang hle a ni ang:

“So, I try to seek pleasures but vainly I try Now joys cup is drained and hope fountain is dry I mix with the living and what do I see Only more cause for sorrows in loosing of thee”

tiin a hui pap pap mai a ni.

Mihrang Vankhama pawhin a ngaihlai Parte-i a then chu a pal zam mai bik awzawng lo;

“Chhuak lo zawk se vawiin ni chu Ngaihlai Parte zamual a liam Luaithli nulin chawnban darzam ka vuan Damtakin aw sawilai Parte Lamtluang chhui zel ang che Mualpui nuar la kal lai kham rawh”

tiin kawla ni chhuak tur pawh nem pil tak a nap a ni.

British literature a Romanticism hmahruaitu ni a an chhal thin Robert Burns paw’n a duhtak, nikir thla a rose par sen mawi tak anga asawi nu a then dawn tum a, a hla phuah hi han chhiar la, han chhiar nawn leh thin teh;

“And fare thee well, my only luve And fare thee well awhile And I will come again my luve Tho’ it were ten thousand miles”. A thu mawl te te kara mittui hi i hmu tel em?

Heng mite hi an demawm lo mai ni lovin an thiam awm tak zet zet a ni. Kan hmu leh ang nge hmu leh lovang tih pawh hriat loh, lo hmu leh dawn ta tehreng pawh ni ila engtikni ah nge ni ang tih pawh hriat lova han inthen hi chu a lungchhiatthlak hleihluak em a ni. Hetiang hunah hi chuan tawngkam tha chhakchhuah kawng a pa insum thei ber ber pawhin, a lo ber ah, ‘mangtha, damtakin aw!’ ti talin an duhtakte an thlah liam thin. Inthenna darkarah hian hmangaihna pawhin a vawrtawp a tawng thin.

Khawvela thawnthu ngaihnawm leh lawm hlawh ber ber leh hla mawi kan tih meng phal mang lova kan ngaihthlak thinte zinga a tam ber hi chu inthenna in a hrin a ni awm a nia. Kan hla ngainat leh duhzawngte chu, PB Shelley thu hi a pawmtlak ngai chuan, hla lungchhiatthlak ber ber te an ni si a. Kristiante lei piahlamin a kan lung a tih len em em chhan leh vanram ngaihtuah hian min tih lawmna chhan chu ‘Inthen’ a awm dawn tawh loh vang niin a lang. Tin, he khawvel hi ninawm kan tih nachhan leh ral thuai se kan duh na chhan chu ‘Lungduh inthenna ram’ a nih vang a ni. Hei vang hi a ni mahna, thalai rual pungkhawm pawhin, inkhawmpui tiak dawn zanah, Lalpa hnenah ‘inkhawmpui tiak tawh ngailo’ kan dil kum tin thin. Leia inthenna mai pawh hi thihna tem lawkna a ni. Kan duhtak te lakah thih tenauin kan thi thin.

Inthenna hi chuti fakaua tawrh hreawm a nih si chuan, engah nge maw kan inthen ni a la thleng dawn tih hrereng chunga thian kan la in siam belh in siam belh a, hmelhriat thar kan chhar zel duh le? Mahni lu chunga meiling chhekkhawm kan ni mai lawng maw? Ka chhanna chu ‘A teuh in a hnai love, thangvankai’ tih a ni. Ka ngaihdan chuan kan mi hmangaihte nena kan awmho laia kan hlimna dawn leh chan hi, anmahni nen kan inthenna avanga kan khawharna dawn leh chan aia a buk rih zawk vang a ni lo thei lovang. Chuti ni suh se, tunge maw mittui nena lungngaihna a in barh lut a, khawharna mal tawrh tur ringawt a mite hmangaih duh ang le? Chuvangin kan khawharna rul tawk hlimna kan dawn hmasak ngei ka ring a ni. Tumah rawn hauh lova khawvel a zaithiam bera ka puan, Freddie Mercury paw’n “One year of love is better than a life time alone” a lo ti ve reng ani. Ka lam tang.

Khawvela thu leh hla banpui Shakespeare (15641616) chuan inthenna hi ‘Lungngaihna Duhawm’ (Sweet Sorrow) a ni, tiin ‘Oxymoron’ mawi takin a chher a. He a thu vuak thlak hi i he lovin ka pawm thlap a ni. Lungngaihna a nih na chhan chu, a hma a kan sawi tawh ang in duhtakte nena inthenna a nih avang a ni. A duhawmna chhan chu, then tur tal pawha duhtak kan neih vang a ni. Duhtak then hi a lungchhiat thlak a; mahse duhtak then tur neih loh hi a lungchhiatthlak zawk fe ang.

Tum khat chu Liverpool lawngchawlhna hmunah, War poet-ho zinga a hnarkaitu pakhat Rupert Brooke (1887-1915) hi New York lam pan turin lawnglian ah a chuang a, chu lawng a a chuanpuite chuan thlahtu laina an nei vek hlawm a; ban vai in an in mangtha sap sap a, Brooke chauh chu thlahtu leh thlahtur nei lo a ni a, a khua a har em em a, mal ngawih ngawih in a in hria, chutia khawhar tak a a din ngawih reng lai chuan vaukama naupang tei rek rek hi a hmu a, chu naupang pan chuan a tlan chhuak nghal a, naupang bul a va thlen chuan, “mama, tunge i hming?” tiin a zawt a, naupang chuan, “William” a lo ti var a.

“William, pence 6/- hlawh i duh em?”
“Duh tehreng mai”
“Chuti chu kan lawng a chhuah dawn vel leh ‘mangtha’ tiin min lo vai ve dawn nia aw?” tih leh pawisa pek chu a rual nghal a. An lawng a chhuah dawn chuan naupang chuan a romol bal zet chu a phawrh a, Brooke nen chuan an in vai liam ve ta lauh lauh a. A ni dawn reng a sin, tumah then tur nei lova hringnun zawh tluan parh chu ngaihtuah ngam chi pawh a ni hrim love.

Kan mi ngaih em em kan then hian khawharna kan mal tawrh ngawt ngawt mai a, tumah in min chhawk thei si lo. Min chhawk thei ta hlauh pawh nise, tuma chhawk kan duh lovang. Engvangin maw? Ele, a tawrh a nuam tlat alawm.

Inthenna hi inthente inkara hmangaihna nasat leh nasat loh fiahna meipui duhawm tak leh, ‘Barometer’ tha tak a ni. Rochefaucold-a dan takah, thliin meipui a chhem alh hluah hluah a, meisi mai mai erawh chu a chhem mit thin ang hian, inthenna hian inngainatna satliah a chhem mit a, a tak erawh chu a chhem alh hluah hluah thin. Chu achhapah inthenna hi inhmuh leh tinuamtu a lo ni bawk a; a kha hle na a, a thlum ru riau a sin.

“Samang then ni te hi, lo her chhuak leh si e Ami leng tawnah hian tuar dan hril thiam awm maw? Duhlai leng zingzin tur, hnahnem hlingpar an hlan Nghilhlohna ser ang cham thei tak maw?”