Tuesday, January 30, 2018

CHHANDAMNA CHHAWNG 3

δΈ€


Mizo Kristiante  hian chhandamna thu hi kan duh em em a, hriat pawh kan hria, sawi pawh kan sawi nasa. Mahse kan hriatchin ah kan bel em em a, kan hre ziktluak leh si lo. He thupui hi a pawimawh si, kan tihsual palh a chatuan thleng pawh a pawi tur ani si avangin hriatfiah a tul em em  ani. He zawhna hi han in zawt ta ila, han chhang dawn chhin teh le.

Q. Chhandamna hi enge a awmzia ?
Heti hian mi tamber chuan an chhang ang – Chhandamna hi chu Isua Krista in kan bawhchhiatna avanga thi tur kan thih ai  Kros a min thih sakna leh chumi va hriat a, Lal Isua chu Lal leh Chhandamtu a va pawmna hi a ni – tiin. A dik chiah. Hei hi Chhandamna bulthut chu a ni, mahse hei ngawt hi kan thlen chin a nih chuan  Setana bumna pakhat- thlamuanna der ah hian kan awk palh hlauh dah ang e. Chutichuan Chhandamna tluantling hi ilo ngaihtuah tlang dawn teh ang.

A  hmasa in Chhandamna hi thilthleng (event) ringawt ani lo va, thilthleng leh inmun (Process)  anni zawk a ni. A fiah lehzual nan mihring nun hi bungthum a ni a -chungte chu event, process leh event an ni. Kan man em aw, pianni (birth), damchhung (lifetime) leh thihni (death) an ni. Birth leh death te hi event an ni a, kan tihve an ni lo a, kan thu pawh a ni hek lo.  Damchhung (lifetime) erawh chu process a ni a, kan tihve lam hlir a ni thung. Keimahni chauh a kan tihtheih erawh a nilo a, tanpui leh kaihhruaina hnuai a kan lo thanglian a, kan zir a, hma kan sawn zel thin a nih hi. Kan nunram a chauh chang hian piang tak tak lo ang in kan inngaih phah ngai chuanglo. Hetiang chiah hi a ni, chhandamna tluantling chu.

Chumi awmzia chu “e.. alo ni reng ani maw” tia Pathian hnen a kan inhlan ni hian chhandamna tluantling kan chang tihna a ni lo, chhandamna huang chhungah kan luh ni, kan pianni ani zawk. Thlarau lam a kan pianni, kan piantharni chu a ni. Chhandamna in a kawh vawrtawp chatuan nunna kan chang leh chan loh chu hun in a hril ang  chu!! Tichuan chhandamna tluantling chu kan hriat makmawh tur chu ani ta ani.

Bible pumpui, chang thenkhat uar bik nei miah lova han zirchian chuan  chhandamna hi thiamchantirna (Justification), simna/thianghlimna (purification/sanctification) leh chawimawina (Glorification) pathum te in a thlenthei dawn chauh tih hi a fiah em em a ni. Heng pathum inbelhkhawm hi chhandamna thuahthum chu ani. A chang chuan pakhatna (Justification) chauh hi chhandamna ang a sawina pawh a awm. Amaherawh  heng pathum te zawm fuh hian Chantuan Nunna ah a hruai lut dawn tih hi Bible pumpui zirtirna chu ani zawk ani. Hetiang hian lo sawi zau i la.

1. Chhandam tawh (Past) Justification
Lal Isua thihna leh thawhlehna, Mizo tawng a thiamchantirna, tlanna, kros thu kan ngaihzawn em em, kan lungkuaitu ber hi chhandamna lungphum chu a ni. Isua Krista in kum 2000 kal ta a min tihsak tawh kha a ni. Kan tih ve pakhatmah a awm lo. Nausen a tih ve pakhatmah awm reng reng lova chhungkua a alo piang ve ang hi a ni. Hei hi Mizoten kan hmelhriat bel hneh hle, a bik in Evangelist te thu ken ber pawh a ni. Pianthar Harhna in a ken tel tlat chu a ni. Fiamthu a  an sawi ang deuh vin kawng sir a zurui let reng pawh hi kaitho ila, fiah zet in helai thu hi  chu a sawi thei ang. A pawimawh em em mai , a lungphum ni miau hek.  Krista thisen zar ah chuan Pathian chhungkua ah kan lo tel ve reng mai tih kan inhriat chhuah hi piantharna a nawlpui in kan tih chu a ni.

Hei hi a nawlpui ah chuan thilthleng (event) a ni ang. Kristian chhungkua zirtirna dawng tha tak  atanga lo seilian naupang erawh a hriat miahloh hlan in engtik hun ah emaw khan a lo chang daih tawh thei tho bawk (Timothea ang te kha).

A nawlpui ah erawh chuan “E..Alo ni reng ani maw” tih a, Justification awmzia va manthiam a, va pawm ( accept/believe) na hi Piantharna chu ani ti mai teh ang. Fapa tlanbo, vawkchaw kuang bula a inngaihtuah chhuak “E khai , hetah riltam in ka thi mai dawn a, ka pa in ah ei tur a tam teh lul nen” ti a a inngaihtuah harh/inngaihtuah chhuak kha  ani. Thenkhat in “varpawh” an tih, 1960 a “pianthar” tih tawngkam  nen khan a sawi tum chu a in ang reng. Hriatfiah chen erawh a inang diak diak lo a ni mai. Hun kal tawh a thilthleng va hriat chhuah hnuhnawh a, rin a, mahni nun a seng luh, telve na hi a ni. Thlarau Thinghlim tanpuina a piantharna (self-realisation ) tite pawn an sawi bawk. Chutichuan he Isua tlanna thu hi kan hriat a, ringhlel lova kan pawm bawk si a avangin Mizote hi kan piangthar deuh vek tawh  a ni  ti tawp mai teh ang.

Mizo te hian he chhandamna chhawng khatna, Thiamchantirna (Justification) hi kan uar em em a. Hei hi chu a hah dam, ngaih thlak pawh a nuam in kan sawi zing bawk. Mahse hei hi chhandamna tluantling ani hauh lo mai le!! Khawi institution emaw a tu in emaw admission min tihfel sak hi Graduation emaw tih tlat hi atna chi khat ani hial ta ve ang.

Hriatfiahna leh rinna ani a, Chhandamna huangchhung a luhna ani, chhandamna tluantling erawh ani hrih lo. Eden college a expel tawh re-admit lehna a ni, a pass leh pass loh chu a damchhung hun in a hril ang chu. Tirhkoh Paula hei hi a uar deuh em aw a tih theih, a uar deuh a nih loh pawh in a sawi nasa a, a sawifiah khawp mai.

2. Chhandam mek(Present)-Sanctification/Purification

Nausen alo pianchhuah hian a tihve tur a ko a innghat a awm ta nghal a, chung chu thawk,thanlen leh damkhawchhuah a ni. A ma duh dan dan a thang pawh ni lo, kaihhruaina hnuai a thanlen ngei chu. Nunna nei tawh ek ek  chuan a bat a an bat chu thawk leh than(growth) a ni. He thanlenna hi believe a ni tawh lo, action zel a ni tawh thung. Chu chuan tuna kan nun a saltanna hrang hrang lak atanga chhandamna keng tel nghal tur ani. Sual bawih a tang mek chu a chhuak zalen nghal ang a, hurna bawih a tang chu a chhuak nghal bawk ang. Chhuak zalen nghal han tih hian event ni lo vin process zawk a ni tih chhinchhiah tlat bawk ila. Hmelmapa hian event ang a min ngaihtir a, min inrinhlelh tir hi a tum ngar ngar thung a ni.Chutiang zel in  retheihna khur a tang chu an lo intodelh tan ang a, lungngaihna khur a tang chu a phurrit chu chhawk in a awm tan bawk ang, mawlna ruam a tang te chu an lo fing sawt sawt in an lo changkang sawt sawt bawk ang.

He process hi nausen kalzir tantir ang lek an la ni a, an tluk palh apiangin hmelma in “I kal thei tak tak chuang lovang’ ti a lo tihbeidawn  a, naupang sawngnawi tak a chhuah a la tum ngat ngat bawk. Hei hi ringtu nun kan tih chu a ni ber, nunpui kan tih pawh hi hei tho hi a ni. Mak deuh chu Setana hi a beidawng ve ngailo- he rinna huangchhung a awm tawh, thanglian tur pawh hi an than a sawt loh nan englai pawh in a bei reng mai hi a mak a ni. He huangchhung a awm reng tawh te pawh hi rinhlelhna, a tawp khawk a RINLOHNA SUAL ah zuk la kuai her leh thei a. Kan misualpui te zing ah pawh an awm tlat a ni. Hei hi tunlai Holistic Mission an tih, mihring  pumhlum  chhandamna an tih ber chu ani. He chhandamna chhawng hnihna hi chuan tun dam chhung a chhandamna/chhanchuahna a kawk a ni. Hei hi Mizo ten kan la hrethiam lo nge kan la hre tlem hle. Inzirtir tam a tul em em a ni.

He chhandamna hi a taka nunpui tia kan sawi uar hi a ni bawk. “Ka ring” ti tu chu alo rinawm deuh deuh na, “Ka awih  e” ti tu chuan thu a lo awi deuh deuh na, Pathian thianghlimna miin a hmuhfiah deuh deuh a, a nun pawh alo thianghlim deuh deuh na chu a ni. Chutichuan chhandamna  chhawngkhatna atang hian vawiin ni a kan harsatna  atanga chhandamna hi kan luh ngei ngei na tur a ni. Thiamchantirna a chiang inti em em, chuta duh tawk, piangthar a dak theih tawh loh, chhandam tawh a boral leh theih tawh loh tia inhnem, nun ah erawh engmah hmuh tur awm si lo, Isua thisen a thiamchantirna a chiang em em si te tan a hriat fiah ngai em em mai chu hei hi ani. Chutihlaiin he  chhandamna chhawng hnihna chauh hi uar leh lutuk, hman a Isua thisen avanga thiamchantirna chhandamna ngaihthah leh hun lo la kal tur a chantuan nunna chang tura chhandamna ring chuang si lo kan nih chuan khawvel a mi vanduai ber Bible in a tih ang kha kan ni si ang. He chhandamna chhawnghnihna hi sakhaw dangte pawh in an zirtir ve tho avangin a liberal theologian leh pluralist ten chhandamna chhawngkhatna leh chhawngthumna paih in tunlai hian an kalpui muah muah mek hi a ni.

A uar thu ah chuan Jakoba leh Petera ten helai an zirtir uar deuh in a ngaih theih awm e. Ringtu naupang(thangtheilo??), tuipui sen kam a Pathian thiltih mak leh nuam leh hlim lam uar lutuk ten helai hi an peih mang derlo. A rau lo an ti deuh tlat zel.

3. Chhandam tur(Future)-Glorification

He tah hian kan tih ve pakhatmah a awm leh ta lo bawk. Isua lo kal leh hun a chhandamna vawrtawp kan chan tur chu ani. Hei hi Mizo zing ah uar fal bik kan awm thin, kalsual pui pawh kan awm hnem ta. Chumi avang chuan chhandamna chhawng hnihna a lungawi tum tur erawh ani si lo. Chutihlai in mi tamtak chuan Chhandamna chhawng hnihna (Present) hmuh kan daih phah nan  zuk hmang  a!! He chhandamna in a thlir ber chu Van Lalram, Chantuan Nunna chu  ani. Miin Holistic Mission(tun dam chhung a Chhandamna) a ngaih pawimawh lutuk a, he Chatuan Nunna chang tura Krista Chhandam in tum ber ngai pawimawh lo anih si chuan Bible in mi vanduai ber a tih te zing a mi ani bawk si ang.

KHAIKHAWM NA

Chutichuan heng chhandamna thuahthum te hi ngaih pawimawh leh uar bik awm lova, thlauhthlak bik awm hek lova, a hun ang zela kan ngaih pawimawh chhohva kan zawm hian chhandamna tluantling chu alo inpharh tawh dawn a ni.

Entirnan, Eden College a hnawh chhuah tawh chu Isua thisen zar ah re-admit kan lo ni leh ta a, admission kan tih leh tak avanga Graduate nghal a inngaih chu bumna a ni, short cut ani bawk. Hei hi khawngaihna lak uchuakna a ni kan ti thei bawk ang. A nih loh leh khawngaihtu hriatchianloh emaw zuam luat vang a ni tal ang. Admission dawt ah chuan zirlai zir tur leh pass ve zel tur erawh a awm tih hriat reng tur a ni. Chu chu Thlarau Thianghlim tanpuina a tlin ve zel tur a ni a, beisei kan ni bawk. Admission ti ve tho ( Piangthar chiang) zir laklawh lai a peih lo, drop out a awm theih zia hi hriat ngei ngei tur a ni.

Zirlai zir tinuamtu, beiseina nung min siamsak tu chu pass chhuah hun a kan hmabak eng tak a ni ang chiah hian, kan zirlai chu hahthlak chang awm mahse, class kal peihloh chang te awm mahse, beidawn rum rum chang te awm mahse, beidawng lo va, harsatna sut tlang hi kan mawhphurhna a nih ang chiah hian ringtute I kal zel ang chu, Chatuan kawl a eng tan ta e.


Lalpan a thu malsawm rawh se. Amen.

Saturday, March 25, 2017

THEIPUI


Kan thupui hi Chanchintha Mathaia ziak 21: 18 – 22-a Lal Isuan Theipui anchhia a lawh thu atang leh 1 Korinth 4:1 thu atang hian i han zirho dawn teh ang.


Theipui anchhe lawh thu hi Marka 11:12-14, 20, 21 pawh kan hmu a. Nimahsela inan chiah lohna an nei a. Matthaia ziakah hi chuan Theipui kung Isuan a hau zawh veleh theipui hnah hi vawilehkhatah (parachema (Gk) = at once) a vuai nghal a. Marka ziakah ve thung hi chuan theipui hnah vuai hi Isuan a hau tukah, chumi kawng veka an kal laiin zirtir ten an hmuh thu kan hmu a. He thu pahnih, chanchin inang sawi danglam kan hmuh atang hian development thenkhat a awm tih a chiang hle. Bible zir mite chuan Chanchin Tha Marka ziak hi Matthaia ziak ai chuan ziah hmasak zawkah an ngai a, chuvangin history lama a dik tak hnaih zawka ngaih a ni.

Theipui chungchang thu:
Bible ah hian theipui kung chungchang thu hi hmun engemawzat ah kan hmu a. Theipui kung hian Israelte nunah pawimawhna tak a neih avangin Palestina rama theipui kung lo than chhoh dan, a rah hun leh a rah laia thil awm dan te hi zir tel a tha awm e.
Theipui kung hi Israel hnam sawina atan hman a ni fo thin. Ram tiam nawm tur zia sawi na (Deut. 8:8), ramtiam lei that zia entir nan ram enthlatu ten Pomegranate leh theipui an hawn (Num. 13:23), remna leh muanna, hausakna entirna (1Lalte 4:25, Mika 4:4, Zakaria 3:10).
Palestina rama theipui hi thing tha tak a ni a; theipui kung puitling len zawng hi 3ft hawlh tlangte a ni theia, 20ft – 25ft a sangte pawh a ni thei. A zar sei zawng ringawt pawh hi 25ft-30ft te pawh a thleng thei a ni an ti. Hei hian Palestina ram ro ah pawh hlim nuam tak a siam a, an hlut em em a ni. Kupra thiarkar ah phei chuan an in kawngka bulah theipui kung hi an phun deuh zel thin. Theipui hlim hnuai hi Pathian pawlna (meditation) leh tawngtaina (prayer room) atana an hman ber pakhat a ni bawk. Hei vang hian Nathanaela pawh Isuan theipui bula a awm lai a va hmu a nih kha (Jn.1:48).
Palestina rama theipui kungte hian danglamna bik riau an neih chu kum khatah vawi hnih an rah thin hi a ni. A rah hmasak zawk hian April thlaah kuhmum tanin June thla ah a hmin thin. Palestina ram theipui mak danglamna em em chu a hmin hun lai hian a hnah a hring dup a, a par vul chuk zel a ni awm e. Ral atanga miin an thlir pawh in a hnah a hring dup a, a par vul chuk chuan chu theipui chu a hmin hun lai, lawh a hun a ni tih an hre thin.

A makna:
He thu hian makna tak mai kawng hnihin a nei a: 1) He theipui hi April thlaah a hnah a hring dup a ni awm e. Isua kha Kalhlen kut hmang turin Jerusalem ah awm a. Kalhlen kut hi April 15 ah hman thin a ni a. Chutichuan he thil thlen lai hi Kalhlen kut hma kar khat vel la awm a thleng  niawm tak a ni. 2) Thil danglam lehtak mai chu Isua khan theipui rah hun lai pawh ni lovah theipui lawh a tum tlat mai hi a ni. “Theipui rah hun a ni lo reng a” (Mk.11:13).

Theipui anchhe lawh chhan:

Tunlai mite ang bawkin Isua hun hma leh hun lai hian thu tha sawi ringawt hi chuan mi thinlungah hna a thawk thei thinS lova. Chuvangin an thusawite a ngaithlatu thinlunga chiang taka an tuh theih nan symbolic action (an thil sawi duh hmuh theihin an entir thin) an hmang thin. Chuvang chuan Isua pawh hian a thu ngaithlatute theipui kung atang hian zirtir duh a neih vangin he thil hi a ti ta a ni ngei ang.

TUIFINRIAT THLIPUI HRANG KARAH

Pathianni zan a ni a, dan pangngai angin mipui ten hla an sak ho zawh ah muang changin Pastor chu a rawn ding chhuak a, pulpit ah a lawn chho a, thuchah a sawi hma in mikhual rawn inkhawm ve mi pakhat chu in hmelhriattirna a nei a. Pastor chuan mikhual pa chu a naupanlai thiantha tak pa a nih thu leh kohhran mipui te hma a chibai bukna leh kohhran mipui te tan a tangkai tur a duh apiang sawina hun a siam sak a.


Mikhualpa chuan hetiang hian a thusawi bul a rawn tan a, "Pafa leh a fapa thianpa te chu Pacific tuipui kam atangin lawng in an zin chhuak a.." "Thlipui na tak a rawn thawh avangin vaukam lama kir leh tum an in kar let pawhin a harsa ta tlat mai. Tuifawn a rawn sang tial tial a, pa ber chu lawngpui tawnhriat ngah tak pawh nimahse tih theih a nei chuang lo, tuifawn in lawng chu a rawn chim nasa telh telh a, pa ber chuan a lawng khalh chu a veng seng ta lo, tuifawn nasa takin a rawn vawrh vak avangin lawng chu a pil dawn dawn ta mai a ni."

Lawng chu tuifawn in a vawrh nasat tak em avangin tuifinriat ah chuan a pil thuai dawn ta si a, lawng khalhtu pa ber chuan thuthlukna harsa tak a siam a ngai ta. Tanpuitu an awm hnaih takin tiin 'tanpuina thir hrui' pawh a thawn chhuak ta nghal a. Mahse tanpuitu hmel reng reng hmuh tur an rawn awm silo. Pa ber chuan inchhanhimna kawr 1 chiah a lo pai si, chu chu a fapa leh a thianpa hnenah pek angai dawn ta a. A fapa zawk chu Kristian a ni a, a fapa thianpa zawk chu Kristian a ni lo thung a ni.

Tuifawn a sang zel a, lawng pawh chu a vawrh nasa tawh lutuk a, chhanchhuahna kawr chu pa ber chuan a pek a ngai ta. "Ka fapa ka hmangaih che" tiin a fapa chu a au vak a, mahse, chhanchhuahna kawr zawk chu a fapa thianpa hnenah chuan a hlan ta zawk a ni. Chu zanthiam thlipui leh ruahsur nasa tak karah chuan pa ber lawngpu chuan a fapa zawk chu chhanchhuahna kawr a hak ve loh avanga tuifawn in lawng a vawrh avanga tuifinriat chhung a tla lut lai chu fiah lo ruaiin ava hmu a, mahse chhhanchhuahna kawr zawk kha  a fapa thianpa a pek si avangin chu chu afapa chan tur zawk chu a ni tih chiang takin a hre lawk sa a ni.

Lawngpu paber nibawk chuan a fapa chu tuifawn in la bo in tuifinriat ah tla hlum mahse a thlarau chu Lal Isua hnenah a thleng dawn tih a chiang hle a, mahse, a fapa thianpa chu Kristian anih ve siloh avangin a thlarau chuan Lal Isua hnen athleng dawn lo tih a hre bawk a. Chuvang chuan a fapa thianpa nunna chhanhim nan chhanchhuahna kawr chu a fapa hnenah pe ta lo in a thianpa zawk chu a pe ta a ni.

Mikhualpa chu a ngawi det a, tihian a sawi chhunzawm a, "Pathian hmangaihna ropui tak chuan chutiang a lawngpu in a fapa thianpa chhanchim nan a a fapa nunna tawp chu a pawiti ta lo ang khan hmangaihna mak tak chu a rawn thlen tir a ni. Kan thlarau chu boralna kal mai tur a nih avangin Pathian chuan a fapa neih chu kan nunna atan krosah a rawn thih tir ta a ni. Chumi avang chuan chhanhim kan ni a, chatuan nunna pek kan ni bawk." tiin. A thusawi zawhah chuan Pastor chuan sermon tawite a sawi chhunzawm leh an bang ta a.


Inkhawm banah chuan mipa rawlthar 2 hian mikhualpa chu rawn bia in, "I thusawi kha a ngaihnawm khawp mai, mahse, a tak tak a ni thei lo ang a chhanchu pa ber in a fapa thianpa chu Kristian anih theih beiseina nen a fapa zawk chu chhanchhuahna kawr pe lo in a thih tir thei a nia" an rawn ti a. Mikhualpa chuan "In ti tha e, ka thusawi kha in lo chik khawp mai" tiin a Bible hlui tawh tak a ken chu dahthat pahin rawlthar 2 te lam chu a hawi leh a. "Ka thusawi kha a tak tak a nih a rinawm loh mai thei a ni, mahse, Pathian hmangaihna thukzia leh a hmangaihna avanga a fapa neih chhun pawh midang ten nunna an neih theihna tur a pek zia te sawi fiah turin zaninah hian Pathian chuan chu entirna chu a tak takin min lo paltlang tir ve tawh asin" a ti a. A thusawi chu an ngawi leh det a, "In awihlo a in demawm lem loh e, mahse maw, in pastor lo ni ta hi ka fapa thianpa chu ania, keimah hi khami zana lawng khalhtu pa ber chu ka ni e. Chutiang chung pawh chuan Pathian hmangaihna thuk zia hi ka hriat ve chhun chu tlem tak a la ni zawk asin" a ti a.

"Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan." (Johana 3:16)