Monday, November 15, 2010

Pathian Fak leh chawimawi



Kohhran hi engnge a nih a, engnge a dinchhan kan tih chuan Pathian fak leh chawimawi tura ringtute inpawlho awm khawm hi a ni. Kohhrante hian Pathian fak leh chawimawi nei ngai ta lo ila, Kohhran nih kan tling zo lovang. Kohhran ten Pathian fak leh chawimawi na ah hian kan thlarau lam nun malsawmna a awm a, chak lo tan chakna, thlarau lam nun hliam tuarte tana damna a ni thin. A huho leh mimal ang pawha Pathian pawlna tak tak hi mi thianghlim te nena inpawlna a tling a ni. Chutiang ang  thlarau lam nun thuk leh ril takah chuan Pathian fakna leh chawimawina chuan mihring hi a hruai lut thin a ni. Pathian fakna leh chawimawina pawimawhna hi tam tak sawi tur a awm, point thum emaw chauh kan sawilang mai dawn a ni.

(i)                 Inpawlna nung: Pathianin mihring a siam chhan chu amah nena inpawl turin a ni. A kutchhuak mihringte chu a hmangaih a, hmangaihna-in a enkawl a, a hruai thin. "Ka ngaiha hlu tak in ni a, mi zahawm tak in ni bawk a, ka hmangaih bawk a che u" a ti a ni(Isaia 43:4). Tin, Mosia hnenah  (Lev 26:11 & 12) "In zingah ka biakbuk chu ka awmtir ang a, ka nunna chuan a hnuchhawn lovang che u. In zingah ka cheng ang a, in Pathian ka ni  ang a, nangni pawh ka mite in ni ang" a ti bawk.  Hetiang hi mihringte chunga Pathian rilru putzia a ni. Pathian chuan mihringte chu a hmangaih a, amah nena inpawl turin hmangaihna avangin a siam a ni. Inpawlna tha lehzual amah leh mihringte inkarah a awm theih nan Lal Isua chu mihringah lo changin leiah a lo piang a, "Pathianin khawvel a hmangaih em em a…a fapa mal neihchhun a pe a" (Johana 3:16) tih a ni. Chutiang ang taka mihringte min hmangaihtu leh a kutchhuak kan nih avangin amah fak leh chawimawi hian ringtu mimal leh Kohhrante nunah pawimawhna leh tulna tak a nei a ni.

(ii)                  Mamawh chhanna: Mihringte taksa leh Thlarau tana kan mamawh zawng zawng min petu chu Pathian a ni. Chu kan Thlarau nun mamawh chu amah fakna leh chawimawina atangin kan chang thin a ni. "Thilpek tha leh thilpek famkim zawng zawng chu chunglam atangin engte Pa hnen ata a lo chhuak thin a ni". (Jakoba 1:17) tih hi a dik a ni. Chutiang titheitu Pathian chu englai pawhin mihringin a mamawh a, amah fakna nun chu Biak Inah chauh ni lovin, khawi hmunah pawh englai pawhin kan nitin nun atan a pawimawh reng a ni. Westminister thu inchhangin "Mihring awm chhan ber chu Pathian chawimawi leh chatuana amah nena inpawl a ni" a ti a ni.

(iii)       Inhlanna: Inhlanna chu Pathian duhzawnga kan taksa leh thlarau a puma a hnena kan inpumpekna hi a ni. Chu chu amah fakna leh chawimawina atangin kan chang thin. "Aw Lalpa, kan taksa leh kan nunna te a pumin, inthawina nung leh thianghlimah I lawm tlak ni turin I hnenah kan inhlan a, I duh angin min hmang ang che" tia inpumpekna a ni. Inhlanna chuan ringtute Pathian biakna thukzia leh hlutzia a tilang a ni.