(Altho' this is not my writing, but since I like the contents and am so much interested about the subject matters for it's also is a burning issue today...So, call it Plagiarism, I just don't mind...Kudos to
Rev ZT Sangkhuma- andrewlfanai)
Mizoram sawrkar thiltih ropuizia hi ka sawi lo thei lo. Hun hei leh chen mi hrisel lo leh bawrhsawm zawk te, hun ropui leh lawmawm Krismas leh Kumthar vuakvetah mahni in lumah awm ngam lovin, Halpuah hal lohna tur hmun lam hawiin thei leh thei lovin an raltlan thin, an va khawngaihthlak em! Tlanchhiatna lam tur pawh hre lova chiai mangang zawng zawng kha kan sawrkar chak tak leh taima tak avangin tlanchhiat a ngai ta lova. A va ropui em! A va lawmawm em! Mizoram Congres sawrkar dam reng rawh sei!
Darn lo mangang tlanchhiatna tur a, Bethlehem Veng leh Kulikawn Vengten - Dam lo mangang, Halpuah hlauva tlanchhia te chu, Bethlehemah lo tlan rawh se! Kulikawnah lo tlan rawh se! tih a ngai ta lo. Krismas leh kumthar vuakvetah Halpuah ri a awm lo. Aizawl khawpui ri bengchheng thin kha, a reh ta duk mai. A va lawmawm tehlul em! Theih loa kan ngaih kha a theih tlat, thiltithei lova inngaiin thil an ti thei lova, thiltitheia inngaiin thil an ti thei, tih thu dik, thufing a lang chhuak ta! Theih loh a theih tlat mai!
Mizoram sawrkarah beseina sang tak kan nei. Sawi ka hreh si, sawi loh theih loh a awm, chu chu Condom hman chungchang hi a ni. Condom hmang tur hian kan inzirtir a, kan inzirtir nasa lutuk. Chanchinbu lamah leh T.V, Radio lam thlengin kan inzirtir mawlh mawlh mai, LPS lam atang phei chuan hmang turin kan inzirtir thiam si. Hetiang inzirtir hi thil dik lo, Sakhuana nen pawha inkalh tlat a ni. Ka ngaimawhna a rei tawh a; mahse sawrkar lam inzirtir dan hian chhan tha tak a nei si, ngaihmawh em em pawh ngaimawh lo ang hrimin kan ngawi lo thei lo va.
Mahse Condom hmang tura inzirtir hi, a thatna awm hauh lo a ni lo va, that dan a neih a vanga ngampa taka hmang tura inzirtir a ni bawk si, manganthlak ka ti em em thin. Condom hman an inzirtir chhan chu, nula tlangvalten inngaih an pumpelh thei si lo, an inngaih loh theih si loh chuan, "Aids natna inhnawih pherh loh nan Condom hmang rawh'' an ti chu a ni a. Ram leh hnam venhimna tura an tih chu niin ka hria. Chuvang chuan Condom hman inzirtir leh inkawhhmuh hi ngaimawh mah ila, ngaimawh thu lo sawi hi miten engtin nge min ngaih ang tih pawh ngaihtuah zel a ngai a, kan ngawih phah lo thei lo a ni.
Mahse Condom hman inzirtir leh hmang tura inkawhhmuh hi thil sual a ni. Heti taka sex hmang tura inzirtir hi chu ka lo thlir ve dan chuan ram leh hnam tan a pawi theih avang leh Sakhaw thil nen inkalh tlat avangin Mizo Society tan hian a him lo a, ram leh hnam hmelma a nih dan a awm.
A that loh em emna chhan chu nula tlangvalte tan hur inzirtirna niin ka hria. Tunah chuan kan Society hi Sodom leh Gomora lam hawia inzirtir niin ka hria a, ka ngawi thei ta lo. Hetianga Condom an hman hian hur tihzualna niin ka ngai hmiah. Nula zingah nau a pai dawn lo tih hrechiang tan inngaih a awl bik em emin ka ring. Insum thei pawh an insum theih loh phahna tur a nih avangin Condom hman inzirtir hi ram leh hnam hmelma lianpui niin ka ngai. Tisa chakna nei ve bawk nau pai, sawn pai hlauva lo insum ngar ngar chu, insum a ngai ta lo va, zalen takin an inpawl ang a, chutianga an inhman than chuan an hur a zual tial tial ang a, KS pun tamna Sodom leh Gomora lam kawng zawhna niin ka ngai. Ka ngaithiam thei lo a ni ber mai. Condom i hman hian mi dangin hmu lo che mah se, i biak Pathianin a hmu reng che.
Hun dangah ziak leh Chanchinbua chhuah ka beisei thin, ka ziak ngam lo va, mahse tunah chuan kan sawrkar chak tak avangin beisei ka nei ta. Condom hmang lo tura inzirtir a theih ta. Mi dimdawi tak chunga Kohhranin a tih hleih theih loh hi he Congress Sawrkar chak tak avang hian beiseina a neih theih ta. Condom hman zahthlakzia leh tenawmzia hi huai taka inzirtir theih a ni. Hetiang suala lut mek leh tlu mek te hi chhanchhuah an ngai. Heti lam kawngah pawh hian Kohhran leh NGO lam zawng zawng leh Sawrkar chak tak hi tangrual ila, theih loh a awm lo. Theih loh hi a lo theih reng mai. Beseina sang tak nei ila. Mizo nula tlangval, Kristian ramah Condom hman a ngai lo, Kristianna leh Condom hman inzirtir hi a zahthlak. Nula tlangval, Kristian zingah Condom hman hi tuman inzirtir loh ni se, inkawhhmuh hi tawp thei se a va duhawm em!
No comments:
Post a Comment