In Hoc Signo Vinces

IN HOC SIGNO VINCES (He chhinchhiahna hmang hian ram i la ang)

October 27, AD 312 chawhnu darthum a ni. Constantine-a chuan Rome khawpui bul lawkah hmun khuarin, Lalber Maxentius-a paihthlak a, a aiawh a tum a. A rilru a hah em avangin a pathian hriat apiang a bia a ni ber.

Thawklehkhatah vana kraws ang deuh eng ruih mai chu a hmu ta phut mai a. A chungah chuan Grik tawng hian, “He chhinchhiahna hmang hian kan hneh,” tih hi a inziak bawk a. A sipaiho pawhin an hmu a, an hlau kher mai. Chhiatna lo thleng tur entirnaah an ngai theuh a.

Chumi zan Rom sipai camp-ah chuan sipai hnar ri bur bur leh Cyprus thing ri sung sung bak thawm dang hriat tur a awm lo. Vengtu sipai pakhat chu Constantine-a puan in kawngka bulah chuan a ding a. Zan thim hnuaiah chuan van a an thil hmuhte kha a ngaihtuah zui neuh neuh a.

Puan in chhunga mu lalber chuan khuh khak khak pah hian, “Vengtu lokal teh,” a ti a. Vengtu sipai chu rang takin puanin-ah chuan a lut nghal a. Constantine-a chuan, Sipai ho kha kaitho vek la, an phawah kraws lem ziaktir vek rawh, officer ho kha rawn luhtir bawk la,” a lo ti a. A officer-te chu mi themthiam deuh ko va, chhinchhiahna thar siamtir turin thu a pe a. Inlarna a hmuh thu leh hmanraw tha ber chi hmanga a thil hmuh chu a lem siam a duh tih a hrilh bawk a.

Hnathawktute chuan rangkachak fei sei tak, a hmawra kraws awm hi an siam a. Puanzar senduk kil li nei, a tlang hmawr rangkachak leh lunghlua cheimawi hi an phuar bet bawk a. Fei hmawra kraws chung lamah chuan rangkachak lallukhum an dah bawk. Rangkachak lallukhumah chuan Grik hawrawpin Isua hming bul hawrawp pahnih an ziak a. Puanzar lai takah chuan Constantine-a te pafa lem a chuang bawk.

Hemi hnu hian Constantine-a chuan a chhinchhiahna thar nen Tiberia lui chung Malvian Leia an indona-ah Maxentius-a chu a hneh ta a. Chuta chin chu Constantine-a chuan Kristian sakhua chu a tan ta bur mai a ni. Tihduhdahna a tawp ta a, a kum lehah baptisma a chang a. Kristianna chu Rom ram chhung sakhuaah a puang ta bawk a ni. Constantine-a Kristian a lo nih atang hian Kristianna leh Rom sawrkar chu an inher danglam ta a ni.