SEX

Hmuhnawm thuah chuan mihring saruak thlalak, han khawsa vel hi chu a hmuhnawm thawkhat zawng a ni. Phat rual a awm lova, sakhuana lama kan hruaitute thleng  pawhin mihring an nih ve hlawm miau avangin hetiang lam hmuhnawm ti lo hi an vang viau ta ve ang. Kan nihna hi ngun deuhvin i han chhut vang vang teh ang. Chanchinbu kan han chhiar a, ‘pawngsual’ tih awmna hi chuan chhiar a hlawh deuh a, thildang pawh bih leh chuang tawh lovin kan han keu nghal a. Kan mit latu te hi hetiang lam hi a ni tlat. Mizote chauh kan ni lova, hnam dang zingah pawh hei hi a dik ve tho. Hei vang hi a ni ta ve ang, sex bu te, sex movies te, sex ngialngan deuh hlek awmna movie te hralh a kal em em zel na chhan te pawh hi. Kan magazine leh lehkhabu kawmte pawh hi sexy hlawm tawh tak a ni. Inhiptawn tura siam ta na chu kan hiptawn narawh-mipa leh hmeichhia hi ! Patar thukhawm zingah pawh nula malmum nalh deuh an han pen lan haih haih mai chuan boruak hi a dang nghal zar zel  a. Ni e, kan mit it zawng leh hmuh duh zawng hi hetiang lam hi a ni tlat a. Pawngsual punlunna chhan ber pakhat pawh hi sex movies chi hrang hrang vang hi a ni a. Kum tling lo khawih duhna thinlung te thleng hian heng movie tha lo enthinna rah hi a ni chawk mai. Heta tanga lang chiang em em chu, “mi pangngai tak pawh mi rilru piangsualah a siam thei” tih hi a ni. Fimkhur a ngai a, inventhiam a pawimawh ta a ni. Mipat hmeichhiatna kawnga awmnem deuh hi mi entawntlak leh ngaihsanawm an ni ngai lova, nulat tlangval laia sex lama insumna nei map lova lo cheng hnih hman mai mai te hi a hmangtuin sualah ngai lo mahsela, khawtlang ngaihah thil zahpuiawm, kan biak Pathian hmaah ngat phei chuan kan dinpui ngam hauh loh tur a nih avangin insum hram hram tur a ni. Nulat tlangval inhmangaihna kawngah a mawi tawk, a sual dai lo tawka invawn thiam kan mamawh a. Mi pawn an tih vang hian sual hi thil tha a nih phah ngai lo. A nihna a ngai reng a, sual a ni reng tho a ni. Hei vang hian inngaizawngte tan inkawm dan tawk thiam a ngai a, mahni thianghlimna hloh thak khawpa inneih hmaa khawsak hian hlimna tluantling thlen aiin inchhirna a thlen fova, ser nung, dam chhung daih neihna a ni.