Text: Matt. 1:23
Mizote hian naupiang hming kan sak hian, an hming awmzia leh anmahni a inpersan fo thin, thuhriltu tam tak ten an sawi kan hre fo tawhin a rinawm. Mahse kan sawi tur Immanuela erawh hi chu chutiang a ni ve tlat lo. A hming awmzia leh a nihna hi a in hmeh thlap mai a ni. Immanuela tih hi Bible ah hian vawi 3 a chuang a, (Is. 7:14; 8:8; Matt. 1:23). Immanuela chu Hebrai hming ani a, mimal hming aiin nihna hming a kawk zawk mah a, a awmzia chu ‘Kan hnenah Pathian a awm’ tiin kan hre fo a, a dik lo, ‘Kan hnena Pathian awm’ tihna a ni. Kan hnena Pathian awma chu Mosia hnenah a inpuang a, Yahweh (Hebrai ho chuan Tetragrammaton an tia, Pathian hming chu an lam ri ngam ngai lova, YHWH tiin an ziak thin) ka ni tiin (Ex. 20:1-3, Is. 42:8, Deut. 6:4,5). Mizo tawnga Yahweh kan lehlin dan ah chuan AWMA tiin kan dah a. Chumi awmzia chu hmana awm, tuna awm, leh nakinah pawh awm tihna ani. Mahse ngun taka chhut chuan hun thu hnuaia lengte’n kan hrilhfiahna mai a ni a, ama nihna a ni lo, Alpha leh Omega-a (Thup. 1:8) chu englai pawha chatuan ata chatuana Imanuela a ni tawp mai.
Awma chu amah avanga khawvel awm, khawvel lo awm theihna hi amah ani a, tun thlenga thil siam zawng zawng awm zel theihna, hi amah a ni. Awma lo chuan nunna a awm thei lova, khawvel hun inher a awm thei lo. Amah awma lo chuan tumah a awm theih loh, pangpar a par lova, rah chhuah a awm thei hek lo, awma lo chuan eng leh thim a awm lova, chhun leh zan a awm thei hek lo. Kan tana pawimawh ber chu Immanuela nena englai pawha inzawm reng hi a ni a. Immanuela/awma nen hian enge kan inzawmna, eng chen nge relationship kan neih tih hi i inzawt theuh ang u. Awma chu kan hnena Pathian awm a ni, kan hnena awm reng chu i pawl thar zel ang u. Immanuela chu kan tana lo piang Isua hi a ni. (Matt. 1:23).
