EASTER Thuchah: A NUNG

Vawi khat chu Handel Young Messiah Conductor, Hans Reichel-a chuan a zaipawl leh rimawi tumtute chu Handel-a hlate mi hmaa an sak hmain enlawkna a neih pui a. A hun dik takah soprano malzaitu chuan dik leh nalh zet mai hian, 'Ka tlantu chu a nung tih ka hria' tiin a rawn sa a. Thiam an tih em avangin mi dang zawng zawng chuan conductorin a fak ngei anlo beisei theuh a. Conductor chuan a zaipawl hruaina tiang hmang chuan rimawi leh zaipawl chu titawpin malzaitu (Solo) chu a pan phei a, pawi tih hmel zet hian " Ka fanu, I tlantu hi a nung tih i hre na nge ? i hria em ?" a ti ta mai a. A ni chuan, " Eng vangin, e,.. aw, ka hriain ka inhria," alo ti buh niai a. Reichel-a chuan, " I hre tak tak a nih chuan chu chu sa ta che; tholeh LALPA thiltihtheihna chuan a awmpui che avanga I hlimna chu ka hriatpui theih turin I hla sak hmang ngei khan min hrilh ta che," a ti ta khur khur mai a. Rimawi tumtu te chu a tantir leh nghal vat a, nula chuan Krista thawhlehna chu a tawmpui tak tak tih tilang thei khawpin a chanvo chu a han sa chho ta a. A ngaithlatute mittui a tla a, conductor putar ngei pawh chuan mittui far koh koh chungin chungin, “I hria e, tunah chuan Krista chu a tholeh ngei a ni tih min hrilh chiang ta!” tiin lawmthu a hrilh ta hial a ni.

Khawvelah hian thilthleng mak leh danglam tak tak a thleng fova. Hman lai ata tawh mitena an sawi hat hat tham thil chi hrang hrang a thleng thin a. A mak leh ropui ber erawh chu Pathian Fapa Isua Krista thlan atanga a tholeh hi a ni awm e. Awih duhlo tu te tan chuan thilthleng thei a mawi lo a ni. Sawihnawm duhtu te tan lah thawnthu ang mai mai sawi tawk anlo awm bawk a. Mahse 'Tholeh Isua' anihna a dang chuang lo. Engtin nge i hriat ? A chhanna chu hei hi - : ‘Nungin kan hnenah a inlar thin alawm’.

Krista thawhlehna hi Kristianna intanna a ni a. Thihna hneh loh LALPA kan neih avang hian 'Aw thihna khawnge i tur chu, aw thlan khawnge i hnehna chu' tiin tui takin min zaitir thin a ni lawm ni ? Ni e A thihna anpuiin Amah nen kan inzawm tawh si chuan A thawhlehna anpui pawh in kan inzawm bawk ang tih kan hre si a.

Thiante u, kan tlantu hi a nung ngei a ni tih kan hre ve em ?

Krista chu a tho leh takzet a ni, Simona hnenah pawh a inlar ta (Luka 24:34), Mari Magdalene hnenah pawh a inlar, I hnenah Tho leh Krista hi a inlar ve em? Tih hi a pawimawh lai tak chu a ni ta. A thawhlehna Thuhretu (Witness of Resurrection) I lo ni ve takzet em? A nung Ka thinlungah/Ka thinlungah a Nung. A va pawimawh em!!! Kan tlantu hi a nung ngei a ni tih la hrelo te’n chu 'Tlantu nung' chu an hmuh ve theih nan Chhuihthangvala leh Lengi ten kan puanven i sawi chhing ang u hmiang.

 Andrew L Fanai

HMEITHAI TE LALPA

 

HMEITHAI TE LAMA TANG LALPA:

Sam 68:5; Jakoba 1:27; Exodus 22:22; Deuteronomy 10:18; Sam 146:9; Isaiah 54:5; I Timothea 5:3; I Timothea 5:5
Heng Bible changte hian Lalpa chu hmeithaite Lalpa leh an lama tang anih zia chiang takin min hrilh a. Lalpa vohbikte an ni fo thin.

Lalpan thlen in atan Hmeithai a thlang fo:
Khawkheng avangin Eliza chu Pathianin Kerith luiah a biruk tir a. Chutah chuan amah chawm turin choakte pawh thu a pe a. Choakten zing leh tlaiah chhang leh sa an rawn putsak thin. Mahse, Pathian tirh leh Pathian remruatna ang thlapa khawsa mek Eliza nunah khan harsatna a lo thleng leh ta tho hi a mak a ni – a tui tlan mek Kerith lui chuan a kangsan ve tlat! Pathian fa, Pathian hruaia awm mekte nunah pawh harsatna a lo thleng thei a ni tih a tilang chiang hle mai. Pathian pawhin  chu chu a phal bawk a. Mahse, Pathian mite chunga harsatna lo thleng thin hi Pathian kaihhruaina mak leh ropui zawk kawng danga a lo lan theihna tur a nih zawkzia kan hmu chhunzawm nghal thuai a ni.

Kerith lui a kang avangin Eliza chu Zidon rama Zarephath khuaah Pathianin kal turin a tir leh a. Chutah chuan amah chawm tura hmeithai pakhat thu a pek thu pawh a hrilh nghal bawk a. Pathianin a chawmtu tura a ruatsak hi mi hausa tak a ni lova, ni khat ei chauh pawh nei zo tawh lo hmeithai a ni leh tlat mai pawh hi mak ve tak chu a ni.

Zarephath hmeithaiin a fapa nen an ei ai pawh ui thei tawh lova Pathian mi Eliza tana a hlan hnua thil lo thleng hi a ropui a, sawi pawh a nuam a ni. Khawkhen leh tam tlak lai taka ruak ve thei lo chhangphut bel leh kang thei lo sahriak um han neih hlauh mai chu! Thilpek azawnga thilpek manhla ber a ni ngei ang. Pathian chu hmeithaite lamtang a nih tlat avangin ei tur nei lo, riltam leh mangang te, mi chak lo zawkte tanpuitu chu a ensan ngai lo va, leilam malsawmna pawh a vur leh nge nge thin.
 
Lusunna hmunah:
Zarephath hmeithai chuan ‘bel te phai thei lo’ a nei a, a hlimin a thlamuang viau ngei ang. Hmeithai vannei leh malsawmna dawng nasa tak niin a inhre ve ngei bawk ang. Mahse, a bel te phai thei lo neih chu a damchhung daih tur a ni lova, ruah a rawn sur leh hma zawng chauh a nih avangin rei lo te atan chauh a ni. Bel te phai thei lo aia he hmeithai tana hlu zawk leh a dam chhung zawnga a innghahna leh thlamuan pui zawk chu a fapa a ni a. Duhthlantir ta ila, he hmeithai hian bel te phai thei lo aiin a fapa chu a thlang ngei ang. Mahse, Zarephath hmeithai tan thil hlu ber a fapa chu a thi leh ta thut mai a, Pathian tihhlum ngei niin zawlnei lah chuan a sawi chiang si a. Hmeithai vannei uaina hrui chu sahchahin a awm ta a ni.

Hetah zet hi chuan Zarephath hmeithai hian a hmaa a malsawmna dawnte avanga a lawmna zawng zawng chu a theihnghilh hneh hle mai a. A hmaa mi vannei tak anga inngai kha tunah chuan Pathian hremna leh anchhia dawngtuah inngaiin zawlnei Eliza a chhuahchhal ta zawk a ni. He hmeithai hian Pathianin amah leh a fapa chunga ro a rel dan chu a hrethiam pha hauh lova. Pathianin a fapa thihna hmang hian bel te phai thei lo aia mamawh chhanna duhawm zawk pek a tum reng a ni.

Zarephath hmeithai pawh khan bel te phai thei lo a neih lai leh a fapaa rinna a nghah lai khan Jehova a hre pha tak tak lova, a rinchhan ber a fapa a thih hnu leh Pathianin a tihnunsak leh hnuah chauh “Tunah zet chuan Pathian mi i ni a, i kaa LALPA thu hi thutak a ni tih ka lo hre ta” (chang 24) a ti thei ta chauh a nih kha. Hetah hian a ni Zarephath hmeithaiin a mamawh dik tak chu bel te phai thei lo leh a fapa a ni lova, bel te phai thei lo leh a fapa nunna petu Pathian ngei chu a ni tih hriatchianna thar a lo chhar tak ni. He Zarephath hmeithai nun atang hian Pathian ringtute mamawh dik tak chu he taksa-in pawnlam thila a mamawhte hi an ni lova, kan nunna hnar kaitu Pathian hriatna dik hi a nihzia kan hriat thar fo a pawimawh hle a ni.
 
 
Mosia dan Exodus leh Deuteronomy bu-a kan hmuhte hi chik taka kan zir chuan hmeithaite, mirethei leh chanhai – fahrah te, ram dang mi te (gerim) leh pa nei lo te humhalhna thu kan hmu tam hle. Heng mite hi khawtlanga mi hnuaihnung leh chhantu nei lo, mite hmuhsit leh endawng an ni a, dan lama humhalh mamawh em em te an ni. Thuthlung Hlui zâwlneite rawngbâwlna laipuitak pawh hmeithai, mirethei leh chhumchhiate humhalhna lam hi a ni. Zâwlnei Amosa-te hunlaiah phei hi chuan retheite tan hmun a chêp êm êm a, tanpuitu nei lovin an chunga thuneitu leh mihausa ten an awpbehna kha an tuar tlawk tlawk mai ani. Thuneitu leh mihausa ten an nawm an maka anchhawr retheih leh aw râwl chhuah thei lova an nêkchêp tlat thîn avângin zâwlneite kha hmeithaite leh miretheite awrâwlah tangin chhanchhuah an nih theih nan huaisen takin an au chhuak thîn a ni.

ISUA EN

 Lk 22:61 : "Lalpa chu a hawi a, Petera chu a EN a."

 

He Bible chânga EN tih hi duhdah taka thil thlir emaw, melh thuak thuak emaw sawina a ni lova; tum nei ran chunga chiang taka en tihna a ni. He thu hi Chanchin |ha Bu dangah a chuang ve lo nain thu danglam tak a ni. Isua khan kha hun khirh tak maiah khan Petera kha a va en kher a. Khatia a hminga ko lova a mita a en ringawt khan chhan a nei ang. A hminga a koh chuan a lo phatsan zo chauh si a a zah lutuk a hlau a ni thei. Chuvangin mi dangin an hriat thiam si loh, mahse Petera erawh chuan chiang taka a hriat thiam theih tur siin a en ringawt ta zawk a ni. Isuan Petera a en khan sawi tum tam tak a nei niin a lang.

 

Chungte chu han chhui zui ila:

(1) Lamlettîr duhna rilru pua en a ni: Peteran Isua a hriat ngai loh thu a sawi ta mai a. Chuvangin Lalpa chu a hawi a, Petera chu a EN a, "Peter, kha leh chen min zui tawh hnu pawh khan min lo la hre lo cheu a ni maw? Ka hmel hi chiang takin han en la, tunge ka nih han sawi \ha leh teh," a ti niin ka hria. En nawn a, hriat chian a duh a ni.

 

(2) Hauh nana en a ni: Isua hi a lungawi chiah lo niin a lang. Dik tak chuan suala kan tlûk hian Pathian hi a lung a awi lo va, zilhhauna thinlung puin min en reng thin a ni.

 

(3) Khap nei chunga en a ni:  "Peter, tun hun pawimawh lai taka min phatsan si chuan engtikah nge maw min ka tana i pen chhuah anga ka tana i din tehlul ang le? Eng ang Zirtir nge i lo nih chiah? Nang hi paukhauh áwm taka Pathian Fapa ka nih puangchhuaktu leh min phatsan loh turzia puangchhuaktu kha i ni lawm ni?" ti rilru chungin a en niin a lang.

 

(4) Khawngaih ngawih ngawih chunga en a ni: Isua khan Petera kha lainat takin a en niin a lang. "Peter-khawngaihthlak, i thinlung han chak loh em emzia tak chu aw… ka puih loh che chuan eng i lo va ang lo tak em," a ti niin ka hria. Ni e, tawngtaiin chaw nghei eng ang mah ila Isua tel lo chuan eng kan lo va ang lo thin tak em. A nih loh vék leh Isua tel chuan tawngtai leh chaw ngheite hi a lo va sawt awm ve le.

 

(5) Kawhhmuh tum nei rana en a ni: Isua khan Petera hriatthiam theih ngei tura chiangin a mitmei a. Chu chuan Petera chu a tih tur dik tak a hriat chhuahtîr ta ngei a, inchhir tawpkhâwkin a \ap ta zawi zawih mai a ni.

 

Kan zirtur:        

 

Eng kawng zâwng pawha kan phatsan hian Pathian hi a lawm lo va. Suala a mite tlûk chhiat phei chu a duh lo lehzual. Chuvangin Isua Krista meuh pawh a lo kal a ni reng a ni. Nimahsela chuti chung pawhin helhmang misual erawh hi chu a tlu leh nge nge thin a ni. Amaherawhchu khawngaihna leh hmangaihna avangin, kan tel lova a awm theih loh vang pawh ni hauh lovin, kan inlamlêt leh theih nana hun remchang min siamsakin Isuan min en reng a ni. Phatsan leh tawh lo tur leh, kan phatsan avanga pawi ti tak chungin min en a ni. Chutia a lawm loh avanga inbengdai thei tawh lo khawpa thinrim chhia erawh chu a ni rih lo; a tel lova engmah kan tih theih lohzia a hriat chian em avangin min khawngaih a, englai pawhin min pui turin a inpeih reng zawk a ni. Min puih peih loh hun lai a nei lova. Petera anga inchhíra kan inlamlêt theih nan leh kan inhriat chhuah theih nan awmze nei takin min en reng a ni zawk.

 

Hawh u, eng pawh kan lo tisual tawh a ni thei: Isua mitmei en thei tawh lo khawpa thu kun reng lovin, Petera anga Isua mitmei en zâwkin Lalpa lam i hawi leh ang u. Chutah chuan thinlung lungchhiatna dik leh kawng ro su, CHATUAN NUNNA chan theihna a awm a. Chuvangin LAL ISUA lam i en tlat ang u.